SIGGRAPH tag 1

de erschti tag isch mal chli ufwärme gsi

ich bin recht frühe wach gsi. und zwar würklich wach. da s im hotel nid würklich es z'morge gä hät, bin ich id "usgehmeile", wo am abig vorher de lärm verursacht hät. de hät's en starbucks gha, i dem ich mir denn zersch emal de wanst voll gschlage han. und mich über d münze gwundered. die händ da 25-cent-münze. und de münz-wert staht nur i buechstabe druffe. komisch.

am 9i han ich de matthias troffe und mir sind zäme zu de registrierig gange. denn händ mir üs wiederum in starbucks gsetzt, das mal aber im convention center, und händ s programm studiert. da s erscht ab em mittag richtig los gange isch, sind mir denn wieer gange. mir händ üs no mit wasser und sandwich welle idecke für de rescht vom tag. aber irgendwie hät fasch alles zue gha! sandwich hät s denn im subway gä.

uf di halbi eis bin ich zrugg an kongress. de erschti programmpunkt isch aber usgfalle wil verschobe. de zweiti isch denn en "kurs" gsi wo mittelmässig spannend gsi isch. s dritti isch denn en kurs gsi wo s drum gange isch, wie me sich sälber chann 3D-displays baue. das isch denn würklich spannend gsi.

zum schluss isch no s "Papers Fast Forward" gsi. deht händ alli paper-presenter chönne i 40 sekunde d lüt uf ihren talk "gluschtig" mache. was durchus amüsant gsi isch, aber meh show als anders. aber es bizeli hät s scho gholfe, s programm vo de nächschte täg zäme stelle..