SIGGRAPH tag 3

automatisch erzügti camouflage, ascii art und gemälde; mehrschichtigi display us wassertröplfi und 2.5-dimensionali cartoons.

da s gester chli spat worde isch, han ich hüt morge d präsentation vom erste paper verpasst. zersch hät mi das nid so gstresst, wil de titel nid so vielversprechend gsi isch. im nachhinein gseh isch das wohl sehr schad, denn di andere drü paper us dere session händ extrem spass gmacht. im zweite händ s camouflage vom computer generiere la. im dritte händ s mit me algorithmus ASCII Art erstelle la. im letschte hät sich de computer als maler betätiged: us fotene sind gemälde worde. alli resultat sind recht erstuunlich und bewundernswert gsi.

aschlüssend hät s nüt me zu dene themene gha, wo mich hauptsächlich interessiered. so han ich chli d qual der wahl gha: zwei paper sessions und a key note. ich han mich für d paper session "expressic rendering & illustrations" entschide. bin aber nur halbwegs debi gsi, usser bim "2.5 cartoon models"-paper. das isch no recht cool gsi und de talk isch weniger talk als viel me demo vo de software gsi. aber alles i allem wäri wohl d key note di besser wahl gsi.

zum z'mittag hät s sushi mit em matthias und drüne vo sine ehemalige ucsd-mitarbeiter gä. de einti isch mir sehr bekannt vorcho. nach me wili han ich denn usegfunde warum: ich han scho en talk vo ihm ghört.

di erschti nomittags session isch no viel wieter wäg gsi vo minem hauptintressensfeld als die vor em mittag. "character animation" find ich zwar es cools thema, han aber viel z'wenig ahnig devo, als das ich eis vo de drü vorgstellte paper au nur halbwegs verstah hetti chönne. um so cooler isch di aschlüssendi "displays and eyes"-session gsi. s erschti paper han ich scho igehend studiert. es isch um d apassig vo de tüfewürkig vo 3D (stereo) film gange. extrem cool isch denn de zweiti talk gsi, i dem s us me beamer und wassertröpfli es mehrschichtigs display baut händ. recht e cooli idee! mal luege, ob d industrie mit dem in zuekunft öppis afange chann. au ganz guet sind di dritte gsi, wo mit handy-display probiered d auge uf wiet- bzw. churzsichtigkeit z teschte. im letschte paper isch es um e realistischi darstellig vo de pupile gange. das han ich aber weder bsunders spannend gfunde, no so würklich gschnallt...