video, video, video und asozial socialize...
di erschti session am morge isch pflichtstoff gsi: es isch um bildverarbeitig gange, also mis thema, aber recht technisch. zudem han ich eis paper evo no gläse gha. jedefalls han ich s gfühl gha, han ich vo dere session nid so viel profitiert, das wo ich us dene paper bruche, muss ich i ebe dene denn no nah läse. di zweiti session isch da scho recht viel lustiger gsi. die hät de titel "video" gha und ebe sotigi hät s denn au en mass z gseh gä. bi me ETH-paper isch es um s "zämeschniede" und "überleite" vo videos wo ei szene us verschidene perspektive filmed gange. dynamic video narratives" hät d gschichte vo videos uf bilder z verzähle probiert, inklusive de bewegige vo de persone oder objekt im film. Video Tapestries händ es ähnlichs ziel: si probiered einem s navigiere dur film z erliechtere i dem dass me dur e art "time line" scrollt und en zämeschnitt vo "key frames" aluegt. wenn me s genauer wüsse wott, chann me a jedere beliebige stell ine zoome. sehr es schöns konzept! de abschluss vor em mittag hät en klassiker gmacht: s ändere vom sieteverhältnis vo me video.de nomittag isch wiet weniger spektakulär gsi. da git's nur no zwei papers z erwähne. s einti isch e cooli verbesserig vo "Photo Tourism" gsi, s anderi en neue und massiv verbesserete asatz vo google street view.
am abig bin ich denn zersch im "electronic theater" gsi, wo videoclips und filmusschnitt us computer animierte film zeigt worde sind. ich bin aber chli enttüscht gsi. einersiets han ich mir die sach fröhlicher vorgstellt. han s gfühl gha, dass praktisch alli videos oder film schweri themene agsproche händ oder action-klamauk gsi sind. han keis einzigs mal glacht oder wenigstens glächled i dene 90 minute. zudem sind s meiste usschnitt us hollywood-produktione gsi und ich han s gfühl gha, ich luege ein film-trailer nach em andere, und gar nid "electrical art".
denn isch es direkt wieter gange ad "reception". die isch au nid eso luschtig gsi, da ich deht niemert kennt han, und s eigentlich en "socializing event" isch. aper praktisch all lüt wo ich mittlerwile us dere "szene" kenne, sind irgendwie mit disney verbandled und a me disney-event gsi, für de ich kei iladig gha han. es hät zwar a de "reception" viel und guet ussehends ässe gha (entgege ihrem ruef), defür isch nur grad eis getränk gratis gsi. für mich genau verhert, denn gässe han ich scho gha...
Filmli luega, filmli schnida, filmli verändere und filmli neu zwägmache. I bin gspannt, wenn du emol Ziit häsch und mir verzella kasch, was iar in Bärn uusprobiered. Ts Mami isch em packe und bi üs rägnets in Ströme. Viel Spass und witeri spannende sessions.
Gruess Papi