SIGGRAPH tag 5

letschte SIGGRAPH-tag mit viel bekannte paper und me bsuech in hollywood.

de letschti SIGGRAPH-tag isch scho fasch de erschti ferietag gsi. am morge han ich mit de olivia telefoniert (iChat lässt grüssen) und han drum di erschte beide papers verpasst. das isch eventuell schad gsi, denn di andere zwei paper us dere session wo ich bsueche han welle, sind ganz guet gsi, au wenn nid so direkt us minem bereich. im erschte isch es um d "umschichtig" vo überenand und inenand liegende 3D-objekt gange, im zweite um paper architecture.

di zweiti session am morge und di erschti am nomittag sind denn überhaupt nid us minem gebit gsi und ich han ne au nid oder nur höchscht marginal chönne folge. dezwüsched bin ich no chli um d hüserblöck spatziert, han mir im quiznos (en subway-konkurrent) es sandwich kauft und han mich im grande hope park uf e sunnigi pank gsetzt. endlich isch es wetter gsi, wie me sich s vo L.A. vorstellt! s t-shirt hät glanged, viellich wäri s au i shorts no gnueg warm gsi. isch wohl ziemlich s erschti mal da, wo ich keis langärmligs liebli agha han.

di letschti session vo dere SIGGRAPH isch denn wieder voll us minem bereich gsi. so sehr, dass ich sogar scho alli vier paper gläse gha han. trotzdem han ich us de meiste vorträg no chli was chönne mitnä, wil s da und deht no öppis gseit händ, wo ich noni gwüsst oder bim läse vom paper nid so genau kapiert han. für die wo sich weniger für technischi details interessiered, isch vor allem s paper über "reshaping of human bodies" witzig. für die wo sich für d geometrie vo rüüm resp. fotene interessiered emfpiel ich no s "image warps for artistic perspective manipulation"-paper. es isch zudem recht näch, a dem wo ich zur üebig als erschts implementiert han.

nach de letschte session isch fertig gsi, ich chli es komisches und abrupts endi gsi. ich bin denn am abig mit em matthias no uf hollywood gfahre. am hollywood boulevard hät üs de taxifahrer abgsetzt. em "walk of fame" sind mir denn en stuck entlang glaufe. wenn das würklich alles isch, wo hollywood z büte hät!? am sunset boulevard händ mir denn i me durchschnittschines z'nacht gässe. irgendwie isch üs alles deht e chli "billig" und "kitschig" inecho. definitiv nid glamourös...

morn reis ich denn am abig wieter uf san fransisco, wo d ferie offiziell afanged. wie s denn mit internet usgseht, weiss ich noni. es isch wohl mit unregelmässigere (b)iträg uf minerer siete z rechne.