das jahr bin ich bereits zum 10. mal zu dem abentür ufbroche. zu dem jubiläum han ich us em einzel- es mannschaftsziitfahre gmacht.
di gladne gäscht, de jan, de matthias und de roman, alles ITL-skater sind, zum teil direkt vom training kommend, gege di 10i am seeplatz itroffe. de thomas hät leider churzfristig müesse absägel. am halbi elfi sind mir i di frischi nacht ufbroche, alli in reih und glied, sich d füerigs-arbet glichmässig teilend. z stäfa sind mir vo me füürwerk beglückt worde und zwüsched üerike und feldbach, wo me uf de see gseht, isch s visuelli highlight cho: im see hät sich de vollmond gspiegled und rund um de see händ mir di viele lämpli gseh. inline(?)-romantik pur!z rapperswil hät s e chlini wasser-fläsche-fülle-pause gä, bi dere de roman sis chopfweh vermäldet hät, bevor s uf de abschnitt mit de schwerste strasseverhältnis gange isch. am endi vom seedamm, zwüsched wädenswil und de au und vo de au bis uf horge hät s kei strasselampe gha. vollmond sei dank hät me aber doch einigermasse gseh. gnueg jedefalls, dass mich de roman lang nach horge gfräged hät, ob di "schlimme stuck" scho dure seiged.
z horge isch de vorsprung vo einere uf drü minute uf mini beste einzelziite agwachse. deht hät denn aber au s liede igsetzt. es sind doch scho öppe 40km i üsne bei gsi. mir hät me das wohl als erschts agmerkt, mit de ziit au em roman und de matthis hät mich z chilchberg gfräged, ob s denn no wiet seigi, bis uf züri. nach me zwüschespurt dur d stadt, eusere "heim-sic-strecki" entlang, hät s am bellevue nomale churzi pause am brunne gä. so händ alli ihri fläsche nomal fülle und es erschts mal über alli ihri liede und druckstelle i de schue chlage chönne.
uf em "heiwäg", so chunnt mir de teil vo züri uf meile immer vor, sind denn d rolle klar verteilt gsi. de jan hät üs bis uf meile ununterbroche windschatte gä. de matthias hät ihm schienbar mühelos chönne folge. de roman und ich händ da doch chli meh mühe gha. ich han gegenüber em roman halt da de "heimvorteil" gha, han genau gwüsst wo mir sind, und je nächer s ziel cho isch, desto me sind mir flügel gwachse. oder mindistens isch es mir immer wie ringer glaufe.
uf höchi seeplatz isch de matthias denn usgrisse und hät s ziel solo, mit 20 meter vorsprung erreicht, wärend mir andere drü üs zäme über d linie a de ample am fährestäg kämpft händ. nach 2 stund und 41 minute sind mir also rund ume gsi, händ mini einzelziit um füf minute chönne verbessere und sind vor allem mal froh gsi, dass es gschafft gsi isch.
nach enere warme duschi händ mir de usflug nomal inere gmüetliche rundi diskutiert, bi chips, brownies, bäretäzli sirup und bier. dadebi hät denn au de jan müesse igestah, dass au er mal sini kriese gha hät. churz vor rapperswil, nur händ mir das nid gmerkt, da mir deht ja ebe d ussicht uf de see gnosse händ. am halbi drü händ mir üs kapput, aber z friede uf de heiwäg gmacht.
danke, jan, matthias und roman für s mitcho, ich han s hart aber lässig gfunde!
Auf der Homepage www.i-t-l.ch gibt es unter der Rubrik "Berichte" weitere Eindrücke von diesem unvergesslichen Ausflug